الحلقه الأولي من حلقات للبنات وبس : "حجابي كله أناقه..وكمان بيرضي ربي.. "

أخــواتي الفضليــات

السـلامُ عليكـن ورحمــة الله

دي أول حلقه من حلقات " للبنات وبس "

وإللي هنتكلمـ فيها عن كل شئ يخصنا كـ بنات مسلمات
من أمور دينيه وأمور دنيويه

الصــوره دي حلوه أوي وعجبتني
ومنها هنبــدأ نتكلم في موضوع مهم جداً
ألا وهو...
ليه متبقاش ملابسك وحجابك كده إسلامي

هيتريقوا ويسخروا منك ..
ملكيش دعوة بيهم ربنا هيحاسبهم هما

هل ياتري ..هيجوا يقفوا جنبك لما ربنا يحاسبك..!؟

هتقولى يارب دول قالولى كذا.. وكذا..

وهما ساعتها ولاهيعرفوكى أصلاً
وهتبقى إنتِ الخسرانه..

هيشبهوكى بالستات الكبار والعواجيز
وإنتِ لسه صغيره والكلام إللي من النوع ده

بس بالله عليكى شغلى دماغك كده شويه إيه علاقة السن بالإحتشام والإحترام
ليه تعصى امر ربنا وإنتِ على علم بيه
عرفت فالزم

عرفتى إن المفروض لا يبدين من زينتهن إلا ما ظهر منها

قول الله تعالى : {ولا يبدين زينتهن إلا ما ظهر منها}

ليه تحطى ماكياج Makeupوتبوظى إبداع الخالق فخلقك

عرفتى إن واضعة العطور زانية ........؟

!ايوه زانية.. بالنص الصريح فالحديث النبوى ما روى ابن حبان والحاكم

و النسائي في باب ما يكره للنساء من الطيب و البيهقي و أبو داود عن أبي موسى الأشعري

مرفوعا : (أيما امرأة استعطرت فمرّت على قوم ليجدوا ريحها فهي زانية)
وبرضه مصممة متنزليش إلا متعطرة
أنا عارفه إن كلنــا سمعنا الكلام ده عشرميت مرهلكن يسهل سماعه ويصعب إلي حد ما تنفيذه
سمعت من بعض البنات لما كنا بنسألها عن حجابها ولبسها
كنا بنلاقي ردود مختلفه لكن من نفس النوعمنها الآتي :
أصل ماما مش موافقه إني ألبس كده
سألناها ليه ..؟
قالت : أصل ماما بتقولي إنتِ لسه صغيره
وهتعجزي نفسكـ
أصل ماما بتقولي إنت كده مش هتتخطبي
ومش هتتجوزي
أصل ماما مش عارفه إيه

أصل بابا مترك إيه

أصل عمتو..

أصل خالتو..

أصل خالو..

أصل وفصل
وسمك لبن تمر هندي
سألناها : طيب مش ماما لابسه زي شرعي.. قوليلها أنا عايزه ألبس زيكـ
( طلعت ماما أصلاً بتلبس مبهرج وبروبرق )
امممممم
ماما القدوة ماشيه مع صيحات العوجه (الموضه) الغــربيه
ولبسها (بادي كارينا واسترتشات ومحزق وملزق وبروبرق )

ممكن لحظــه..!
----------
أكيد كل بنت فينا بكره هتكون أُم إن اراد الله
يعني لازم تكون قدوة صالحه يقتدي بها
أولادها وبناتها
وأكيد كل بنت فينا بتحلم بالزوج الصالح والذريه الصالحه إللي يفتخــر بيهم

طيب منين بنتمني الزوج الصالح والذريه الصالحه
وإحنا غير مؤهلين إننا نكون أزواج صالحات..!!

طيب ماشي إيه هي المؤهلات ؟؟؟

نا مروحتش بعيد سألت الطرف التاني
بس مقولتش إيه مؤهلاتها
قولت إيه هي موصفات فتاة أحلامك ؟؟
لاقيت معظم الردود متفقه علي تلاته :-

- تكون بتعرف دينها كويس
- أخلاقها عاليه

- ذكيه

نعم..!التلاته دول بس
إزاي بقي
مش فاهمه

الردود متشابهه ومنهم إللي قالوا :-
تكون بتعرف دينها عشان لو عرفه دينها كويس

أكيد هتعرف تتعامل معايا وهتتقي الله فيه

وهتبقي عارفه إن دي طاعه عليها وواجب

طيب أخلاقها ياعم

قام قايل :
ممكن تكون عارفه تعاليم دينها

لكن أخلاقها مش كويسه

إيه ده استني كده
إزاي

قام قايل:
مينفعش إلتزام بدون أخلاق
ومينفعش أخلاق بدون إلتزام

نحمممم
أنا مش فاهمه

قام رد وقال:
يعني يافرحتي لما تكون ملتزمه قدام الناس
ومن ورا الناس بتعمل بلاوي
والاسم ملتزمه

اه تمام

ويافرحتي برضه لما تكون خلوقه جداً

ومتعرفش تعاليم دينها كويس

كابتن كابتن لحظه الله يخليكـ
إزاي بقي

يعني يافرحتي لما تكون مؤدبه

لكن لبسها غير مؤدب
والناس مظاهر

حلوه دي
تمام
طيب ذكيه دي بقي إيه دخلها في الموضوع

قام قايل :
ماهي لو ذكيه أكيد مش هتخلي ولا صفه

من إللي قولناهم تروح منها
ده غير المعني الشامل للذكاء

:D :D حلوه
طيب بالنسبه للجمال

قام قايل :
لو اجتمعت الصفات التلاته فيهاهكتفي

بكده وهتبقي عندي ميس إيجيبت

ما بلاش كلام الأفلام ده

لا والله مش كلام أفلام
ده الحقيقي

إزاي بقي هنفشر

يعني يافرحتي لما تبقي جميله

ومفيهاش ولاصفه من الصفات التلاته دول
دي ممكن تجن أهلي

حلوه
تمام
طيب تحب تقول حاجه في نهايه البرنامج
احمممم

في نهايه الحوار

قام قايل :
الزوجه الصالحه أو الأم الصالحه

بمثابه القلب في جسد الإنسان
فإذا صلَح القلب صلَح الجسد كله

وإن فسَد القلب فسَد الجسد كله

وضاع صاحبه

لافض فوك
شكراً جزيلاً لحواركم الممتع
وانتهي الحواروها هي مؤهلات الزوجه الصالحه

من وجهة نظربعض الشباب ( العاقلين )

عجبتني أوي الردود دي وعجبني آخر حاجه قالها شاب منهم
إن الزوجه الصالحه أو الأم زي القلب في جسدالإنسان
لو صلح صلح كل شئ في جسده

بمعني لو كانت صالحه صلح البيت كله

ولو كانت فاسده فسد البيت كله
وهتبقي قدوة بحق مش زي طنط أم صحبتنا دي
عشان ميجيش حد ويطبق علينا مثل

"أقلب القدره علي فمها تطلع البنت لأمها"
لو أنا ملتزمه ومتدينه وخلوقه و..و..و

أكيد بنتي لما تشوفني كده هتبقي نفسها تبقي زيوهتقلدني

انسوا بقي الموال ده كله

وتعالوا نفكــر كده ونشوف حجابنا شكله إيه

مواصفات الحجاب الشرعي والشروط الواجب توفّرها مجتمعةً حتى يكون الحجاب شرعياً
الأول: ستر جميع بدن المرأة على الراجح

(مع الأختلاف لآراء العلماءفي علماء قالت كل الجسدوفي علماء قالت كل الجسد ماعدا الوجه والكفين..
طبعاً في بنات لابسه خمار وفي حجاب شرعي (شبيه بالخمار)

نقابوفي إللي لا لابسه نقاب ولاخمار)

الثاني: أن لا يكون الحجاب في نفسه زينة
الثالث: أن يكون صفيقاً ثخيناً لا يشف
الرابع: أن يكون فضفاضاً واسعاً غير ضيق
الخامس: أن لا يكون مبخراً مطيباً
(يعني مش قبل ما تنزلي تمسكيلي شويه برفان ....وتششش تششش واديلوا ادي اديلوا ادي )
السادس : أن لا يشبه ملابس الكافرات
السابع : أن لا يشبه ملابس الرجال الثامن : أن لا يقصد به الشهرة بين الناس

امممممممم
ماتيجوا نساعد بعض وناخد بإيد بعضونبدأ وناخد خطوه إننا نصلح حجابناولبسنا
تعالوا نشوف إيه إللي يريحنا
وإيه مشاكلنا وإيه العوائق إللي بتقابلنا
ليه في بنات لابسه زي شرعي إسلامي.. وفي بنات لا..؟؟
طيب دول أحسن من دول في إيه..؟؟؟

وإحنا ياتري مين من دول ؟؟؟؟؟
ومتنسوش إن الصيف جاي عايزين نخلي شعارنا الصيف ده

" حجابي كله أناقه.. وكمــان بيرضي ربي "

قــــــــريبــاً ستنطلق هذه الحمله
تعالوا نفتح مجال للحوار
وآهلاً بالمناقشة

أختكم في الله ساميه